Häzirki döwürde ýurdumyzda syýahatçylyk pudagynyň ösüşine aýratyn üns berilmegi netijesinde ata Watanymyzyň tebigy we taryhy-medeni gymmatlyklary, baý milli däpleri hem-de olaryň özboluşlylygy bilen dünýä halklarynyň tanyş bolmagyna uly mümkinçilikler döredilýär. Ýurdumyzda hereket edýän syýahatçylyk kärhanalary Türkmenistan döwletimiz bilen gyzyklanýan her bir daşary ýurtly syýahatçy üçin gezelençleri şeýle-de täjirçilik duşuşyklary guranlarynda baran sebitiniň taryhy we ülkäni öwreniş muzeýlerine gezelençleri, meýilleşdirilen syýahat ugrunyň hataryna goşmaklary biz muzeý işgärlerini has-da buýsandyrýar. Şeýlelik-de 2024-nji ýyl–“Pähim-paýhas ummany Magtymguly Pyragy” ýylynda ýurdumyzda hereket edýän syýahatçylyk kärhanalary tarapyndan welaýatymyzyň gözel tebigaty, taryhy-medeni ýadygärlikleri bilen gyzyklanýan, dostlukly döwletlerden gelen syýahatçylaryň köp sanlysy Daşoguz welaýatynyň taryhy we ülkäni öwreniş muzeýimize-de gezelenje geldiler. Gezelenjiň dowamynda muzeý işgärleri tarapyndan daşary ýurtly syýahatçylary muzeýiň sergi zallarynda ýerleşdirilen muzeý gymmatlyklarynyň taryhy, gelip çykyşy we ähmiýeti barada täsirli gürrüňler berlip, tanyş edildi. Myhmanlaryň, halkymyzyň milliligi bilen içgin gyzyklanmalary, öz ýurtlaryndaky muzeý esbaplary bilen meňzeşlikler barada, internet torunda “virtualmuseum.gov.tm.” websaýtynyň üsti bilen ýurdumyzyň muzeýleri bilen tanyş bolandyklary baradaky söhbetler, biz muzeý işgärlerini has-da joşgunly işlemäge ruhlandyrýar.
Oňyn Bitaraplyk, parahatçylyk söýüjilik, hoşniýetli goňşuçylyk, agzybirlik we döredijilik ýörelgelerine esaslanýan hormatly Prezidentimiziň baştutanlygynda şeýle döwletli işleriň amala aşyrylýandygyna haýran galýandyklary baradaky sözleri, dostana halklaryň wekillerinden eşitmek biziň her birimiz üçin juda ýakymly! 22.10.2024 ý.
Taýýarlan: Medeni aň-bilim we usulyýet işleri
bölüminiň ekskursiýanyň ýolbaşçysy Laçyn Nurmedowa

Ýerine ýetiriji: Muzeý gymmatlyklaryny hasaba almak
we saklamak bölüminiň ylmy işgäri B.Uzakberdiýew